ဦးနှောက်ထဲ စက်ပစ္စည်းထည့်သွင်းပြီးနောက် လေဖြတ်နေတဲ့အမျိုးသားတစ်ဦး ကိုယ်တိုင်ပြန်လည်စားသောက်နိုင်လာ
<p>၂၀၂၀ ပြည့်နှစ်က ရေငုပ်ရာကနေ မတော်တဆဖြစ်ပြီး ရင်ဘတ်အောက်ပိုင်း လေဖြတ်သွားခဲ့တဲ့ နယူးယောက်မြို့က ကိသ် သောမတ်စ် ဆိုတဲ့</p>
၂၀၂၀ ပြည့်နှစ်က ရေငုပ်ရာကနေ မတော်တဆဖြစ်ပြီး ရင်ဘတ်အောက်ပိုင်း လေဖြတ်သွားခဲ့တဲ့ နယူးယောက်မြို့က ကိသ် သောမတ်စ် ဆိုတဲ့ အမျိုးသားဟာ စမ်းသပ်အဆင့် ဦးနှောက်တွင်း စက်ပစ္စည်းထည့်သွင်း ကုသမှုကြောင့် ပျက်စီးသွားတဲ့ ခါးရိုးဆစ်အာရုံကြောတွေကို ကျော်ဖြတ်ပြီး ကိုယ်တိုင်ပြန်လည် စားသောက်နိုင်တဲ့ အဆင့်ကို ရောက်ရှိလာပါတယ်။
ဒါဟာ ဖိန်းစတိန်း ဆေးဘက်ဆိုင်ရာ သုတေသနဌာနရဲ့ စမ်းသပ်မှုတစ်ခုဖြစ်ပြီး ဆရာဝန်တွေက သူ့ရဲ့ဦးနှောက်ထဲမှာ သေးငယ်တဲ့ Electrodes လေးတွေကို ထည့်သွင်းပေးခဲ့တာ ဖြစ်ပါတယ်။
အဲဒီ စက်ပစ္စည်းက ဦးနှောက်ကလာတဲ့ လှုပ်ရှားမှုအချက်ပြချက်တွေကို ဖတ်ယူပြီး လက်မောင်းနဲ့ လက်တွေဆီ တိုက်ရိုက်ပေးပို့ပေးသလို လက်ကရတဲ့ ထိတွေ့မှုအာရုံတွေကိုလည်း ဦးနှောက်ဆီ ပြန်ပို့ပေးတဲ့အတွက် ထိတွေ့မှုအာရုံကိုပါ ပြန်လည်ရရှိစေပါတယ်။
ဒီစမ်းသပ်မှုမတိုင်ခင်က သောမတ်စ်ဟာ လက်မောင်းကို အနည်းငယ်သာ လှုပ်ရှားနိုင်ခဲ့ပေမယ့် ၃၅ ပတ်ကြာ ကုထုံးခံယူပြီးနောက်မှာတော့ ကိုယ်တိုင်စားသောက်နိုင်တာ၊ ခွက်နဲ့ရေသောက်နိုင်တာအပြင် ကြက်ဥလိုမျိုး ကွဲလွယ်တဲ့အရာတွေကိုပါ ကိုင်တွယ်နိုင်လာပါတယ်။
ဒါ့အပြင် သူ့ရဲ့ ညာဘက်လက်မောင်း ကြွက်သားအင်အား ၈၆ ရာခိုင်နှုန်းနဲ့ ဘယ်ဘက်လက်မောင်း ကြွက်သားအင်အား ၆၂ ရာခိုင်နှုန်းအထိ တိုးတက်လာခဲ့ပါတယ်။ အဲဒီ ဦးနှောက်လေ့ကျင့်ရေး နည်းလမ်းကြောင့် မတော်တဆဖြစ်ပြီးကတည်းက ပျောက်ဆုံးနေတဲ့ ထိတွေ့မှုကို ပြန်ရခဲ့ပါတယ်။
အံ့ဩဖို့ကောင်းတာက ဦးနှောက်ထဲက စက်ပစ္စည်းကို ပိတ်ထားတဲ့အချိန်မှာတောင်မှ ၂ နှစ်ကျော်ကြာတဲ့အထိ အဲဒီ တိုးတက်မှုအချို့က ကျန်ရှိနေသေးတာကို သုတေသီတွေ တွေ့ရှိခဲ့ရပါတယ်။
ဒီကုထုံးဟာ သူ့ရဲ့အာရုံကြောစနစ်ကို ပြန်လည်ကောင်းမွန်လာအောင် ကူညီပေးနိုင်ခဲ့တယ်လို့ ယူဆရပြီး ဒါကို အတည်ပြုဖို့အတွက် ပိုမိုကြီးမားတဲ့ လေ့လာမှုတွေ ဆက်လုပ်ဖို့ လိုအပ်ဦးမှာ ဖြစ်ပါတယ်။
ဒီသုတေသနကို Nature Medicine ဂျာနယ်မှာ ဖော်ပြထားတာဖြစ်ပြီး အခုနည်းပညာဟာ စမ်းသပ်ဆဲအဆင့်သာ ရှိသေးတာကြောင့် ပုံမှန်ကုသမှုအဖြစ် မရရှိနိုင်သေးပေမယ့် ခါးရိုးဆစ်အာရုံကြော ထိခိုက်ဒဏ်ရာရထားသူတွေ လှုပ်ရှားမှုနဲ့ ထိတွေ့မှုအာရုံ ပြန်လည်ရရှိဖို့အတွက် အရေးပါတဲ့ ခြေလှမ်းတစ်လှမ်း ဖြစ်လာနိုင်တယ်လို့ သုတေသီတွေက ပြောထားပါတယ်။
