ကမ္ဘာ့ ပထမဆုံး AI မင်းသမီး ရုပ်ရှင်အသစ်မှာ သရုပ်ဆောင်မည်
<p>ယူကေအခြေစိုက် Particle6 အမည်ရတဲ့ AI ကုမ္ပဏီဟာ “Misaligned” လို့ အမည်ရတဲ့ ရုပ်ရှင်အသစ်မှာ သရုပ်ဆောင်ဖို့အတွက်</p>
ယူကေအခြေစိုက် Particle6 အမည်ရတဲ့ AI ကုမ္ပဏီဟာ “Misaligned” လို့ အမည်ရတဲ့ ရုပ်ရှင်အသစ်မှာ သရုပ်ဆောင်ဖို့အတွက် Tilly Norwood လို့ခေါ်တဲ့ AI ဖန်တီးထားတဲ့ ဒစ်ဂျစ်တယ်မင်းသမီးတစ်ယောက်ကို ရွေးချယ်လိုက်ပါတယ်။
Tilly ဟာ တကယ့်လူသားတစ်ယောက်မဟုတ်ဘဲ ဒစ်ဂျစ်တယ်ဇာတ်ကောင်တစ်ခုသာ ဖြစ်ပြီး ဒါဟာ အဲဒီကုမ္ပဏီရဲ့ ပထမဆုံးရုပ်ရှင်ရှည်ကြီး ဖြစ်သလို Tilly အတွက်လည်း ပထမဆုံး ခေါင်းဆောင်မင်းသမီးနေရာ ဖြစ်ပါတယ်။
ဒီရုပ်ရှင်မှာ Tilly ဟာ “Tillyverse” လို့ခေါ်တဲ့ ဒစ်ဂျစ်တယ်ကမ္ဘာမှာ နေထိုင်ရင်း တခြား AI တစ်ယောက်နဲ့ တွေ့ဆုံပြီးနောက် လူသားတွေလိုမျိုး အတွေးအခေါ်၊ ခံစားချက်နဲ့ အိပ်မက်တွေ ရှိလာတဲ့ AI ဇာတ်ကောင်နေရာကနေ သရုပ်ဆောင်မှာ ဖြစ်ပါတယ်။
Particle6 ကို တည်ထောင်သူ Eline van der Velden က ဒီဇာတ်ကောင်အတွက် အချောသတ်ပုံစံကို မရွေးချယ်ခင် Tilly ရဲ့ ပုံစံကွဲပေါင်း ၂,၀၀၀ နီးပါးကို ဖန်တီးခဲ့ရတယ်လို့ ပြောပါတယ်။
ဒါ့အပြင် ဒီရုပ်ရှင်ကို AI တစ်ခုတည်းနဲ့ ဖန်တီးနေတာမဟုတ်ဘဲ လူသားစာရေးဆရာတွေ၊ ဒါရိုက်တာတွေ၊ အယ်ဒီတာတွေနဲ့ Visual Effects ပညာရှင်တွေ အပါအဝင် ရုပ်ရှင်လောကသားတွေ အားလုံးက AI နဲ့အတူ လက်တွဲလုပ်ဆောင်နေတာ ဖြစ်တယ်လို့ ဆိုပါတယ်။
ဒါပေမဲ့ AI မင်းသမီးကို အသုံးပြုမယ့်အစီအစဉ်ဟာ ဟောလိဝုဒ်မှာ ဆွေးနွေးငြင်းခုံမှုတွေ ဖြစ်ပွားစေခဲ့ပြီး SAG-AFTRA သရုပ်ဆောင်များသမဂ္ဂကတော့ ဒါဟာ လူသားသရုပ်ဆောင်တွေရဲ့ အလုပ်အကိုင်တွေကို ထိခိုက်စေနိုင်တဲ့အပြင် ဖန်တီးမှုဆိုင်ရာ အခွင့်အရေးတွေနဲ့ ပတ်သက်လို့ မေးခွန်းထုတ်စရာတွေ ရှိလာတယ်လို့ စိုးရိမ်ပူပန်နေကြပါတယ်။
ဒီအပေါ်မှာ Particle6 ဘက်ကတော့ သူတို့ရဲ့ ရည်ရွယ်ချက်ဟာ လူသားသရုပ်ဆောင်တွေကို အစားထိုးဖို့ မဟုတ်ဘဲ လူသားတွေနဲ့အတူ AI ကို ဖန်တီးမှုဆိုင်ရာ ကိရိယာအသစ်တစ်ခုအဖြစ် အသုံးပြုဖို့သာ ဖြစ်တယ်လို့ ပြောပါတယ်။
AI မင်းသမီးတစ်ယောက်ကို အဓိကဇာတ်ဆောင်နေရာမှာ ပရိသတ်တွေ လက်ခံပါ့မလားဆိုတာ မသေချာသေးပေမယ့် “Misaligned” ရုပ်ရှင်ဟာ အဲဒီအတွေးအခေါ်ကို လက်တွေ့စမ်းသပ်ပြမယ့် ပထမဆုံးသော ရုပ်ရှင်တစ်ကား ဖြစ်လာဖို့ မျှော်လင့်ရပါတယ်။
