သူခိုးတွေရဲ့ ပစ်မှတ် ဖြစ်လာတဲ့ AI ဒေတာစင်တာသုံး ပစ္စည်းနဲ့ ကြေးနီများ
<p>အေအိုင်နည်းပညာဆိုင်ရာ အခြေခံအဆောက်အအုံ လိုအပ်ချက်တွေ မြင့်တက်လာတာနဲ့အမျှ ဒေတာစင်တာတွေ တည်ဆောက်ရာမှာ သုံးတဲ့ ကြေးနီနဲ့ တန်ဖိုးကြီး ပစ္စည်းတွေကို</p>
အေအိုင်နည်းပညာဆိုင်ရာ အခြေခံအဆောက်အအုံ လိုအပ်ချက်တွေ မြင့်တက်လာတာနဲ့အမျှ ဒေတာစင်တာတွေ တည်ဆောက်ရာမှာ သုံးတဲ့ ကြေးနီနဲ့ တန်ဖိုးကြီး ပစ္စည်းတွေကို သူခိုးတွေက ပစ်မှတ်ထား ခိုးယူတာတွေ ပိုများလာပါတယ်။
လတ်တလောမှာပဲ အီလီနွိုင်းပြည်နယ် အာဏာပိုင်တွေဟာ ချီကာဂိုမြို့အနီး ကုန်ကားကွင်းတစ်ခုမှာ ဒေါ်လာ ၁.၃ သန်းတန်ဖိုးရှိ ဒေတာစင်တာသုံး ပစ္စည်းတွေ တင်ဆောင်ထားတဲ့ ခိုးယူခံရတဲ့ တွဲကား ၂ စီးကို ပြန်လည်သိမ်းဆည်းရမိခဲ့ပါတယ်။
အဲဒီတွဲကားတွေထဲမှာ အာလာဘားမားပြည်နယ်ကနေ ခိုးယူလာတဲ့ ဒေါ်လာ ၃၀၀,၀၀၀ တန်ဖိုးရှိ ကြေးနီကြိုးတွေနဲ့ ဖလော်ရီဒါပြည်နယ်ကနေ ခိုးယူလာတဲ့ ဒေါ်လာ ၁ သန်းတန်ဖိုးရှိ ဒေတာစင်တာသုံး ပစ္စည်းတွေ ပါဝင်ပါတယ်။
ဒါဟာ အမေရိကန်တစ်ဝှမ်းမှာ အေအိုင်ဒေတာစင်တာတွေ ပိုမိုဆောက်လုပ်လာတာနဲ့အမျှ ရာဇဝတ်သားတွေက တန်ဖိုးကြီး နည်းပညာ ပစ္စည်းတွေကို ပစ်မှတ်ထားလာကြတဲ့ ဖြစ်စဉ်တစ်ခုပဲ ဖြစ်ပါတယ်။
အထူးသဖြင့် ကြေးနီကြိုးတွေ၊ ဆာဗာတွေနဲ့ လျှပ်စစ်ပစ္စည်းတွေဟာ သူခိုးတွေရဲ့ ပစ်မှတ်တွေ ဖြစ်လာနေပါတယ်။ ကုန်စည်ခိုးယူမှုတွေကြောင့် စီးပွားရေးလုပ်ငန်းတွေမှာ နှစ်စဉ် ဒေါ်လာ ဘီလီယံ ၃၅ အထိ ဆုံးရှုံးနေရတယ်လို့ အမေရိကန် ပြည်တွင်းလုံခြုံရေးဌာနက ပြောကြားထားပြီး စနစ်တကျ ဖွဲ့စည်းထားတဲ့ သူခိုးအုပ်စုတွေဟာ နည်းပညာနဲ့ အခြေခံအဆောက်အအုံဆိုင်ရာ သယ်ယူပို့ဆောင်ရေးတွေကို ပိုမို အာရုံစိုက်လာကြတယ်လို့ ကျွမ်းကျင်သူတွေက သုံးသပ်ထားပါတယ်။
