သိန်း ၅၀၀ ကျော်တန်ကြေးရှိ မက်ဆီ နဲ့ ရော်နယ်ဒို ဖုန်းတွေ လာပြီ
<p>အီလက်ထရွန်နစ်ပစ္စည်းတွေကို ရွှေ၊ အဖိုးတန်သတ္တုတွေနဲ့ မွမ်းမံပြင်ဆင်ပေးလေ့ရှိတဲ့ Caviar ကုမ္ပဏီဟာ ၂၀၂၆ ကမ္ဘာ့ဖလားပြိုင်ပွဲနဲ့ အချိန်ကိုက်ပြီး”Legends” လို့</p>
အီလက်ထရွန်နစ်ပစ္စည်းတွေကို ရွှေ၊ အဖိုးတန်သတ္တုတွေနဲ့ မွမ်းမံပြင်ဆင်ပေးလေ့ရှိတဲ့ Caviar ကုမ္ပဏီဟာ ၂၀၂၆ ကမ္ဘာ့ဖလားပြိုင်ပွဲနဲ့ အချိန်ကိုက်ပြီး”Legends” လို့ အမည်ရတဲ့ ဖုန်းအသစ်တွေကို မိတ်ဆက်လိုက်ပါတယ်။
လာမယ့် ဇူလိုင်လ ၂၂ ရက်နေ့မှာ ထွက်ရှိမယ့် Samsung Galaxy Z Fold 8 Ultra နဲ့ လက်ရှိ Apple ရဲ့ ထိပ်တန်းဖုန်းဖြစ်တဲ့ iPhone 17 Pro တို့ကို အထူးဒီဇိုင်းတွေနဲ့ ပြုလုပ်ထားတာ ဖြစ်ပါတယ်။
အဲဒီ ဖုန်းဒီဇိုင်းတွေကို နာမည်ကြီးဘောလုံးသမားတွေဖြစ်တဲ့ လီယွန်နယ် မက်ဆီနဲ့ ခရစ္စတီယာနို ရော်နယ်ဒိုတို့ကို အခြေခံပြီး ဖန်တီးထားတာ ဖြစ်ပါတယ်။
မက်ဆီဗားရှင်းအတွက် မထွက်ရှိသေးတဲ့ Samsung Galaxy Z Fold 8 Ultra ကို အသုံးပြုထားပြီး အာဂျင်တီးနားအသင်းရဲ့ အဖြူနဲ့ အပြာရောင်တွေ၊ ဂျာစီနံပါတ် ၁၀ နဲ့ မက်ဆီရဲ့ ပုံတူကို ထည့်သွင်းထားပါတယ်။
ရော်နယ်ဒိုဗားရှင်းကိုတော့ iPhone 17 Pro နဲ့ Pro Max တို့ကို အသုံးပြုပြီး ပေါ်တူဂီအသင်းရဲ့ အနီနဲ့ အစိမ်းရောင်တွေ၊ နံပါတ် ၇ နဲ့ ပေါ်တူဂီနိုင်ငံတံဆိပ်တို့နဲ့ ပုံဖော်ထားပါတယ်။
ဖုန်းနှစ်မျိုးလုံးရဲ့ ဘောင်တွေနဲ့ အနားသတ်တွေကို ၂၄ ကာရက်ရွှေနဲ့ စီခြယ်ထားပြီး ဒီဇိုင်းတစ်ခုစီအတွက် ၁၉ လုံးစီပဲ ကန့်သတ်ထုတ်လုပ်မှာ ဖြစ်ပါတယ်။ ဈေးနှုန်းတွေအနေနဲ့ မက်ဆီဗားရှင်း (256GB) ကို ကန်ဒေါ်လာ ၁၃,၁၃၀ ကနေ စတင်မှာဖြစ်ပြီး ရော်နယ်ဒိုဗားရှင်း (256GB) ကိုတော့ ကန်ဒေါ်လာ ၁၁,၄၁၀ ကနေ စတင်မှာ ဖြစ်ပါတယ်။
Ref: Gizmochina
