လူတူစက်ရုပ် ထုတ်တော့မယ့် Meta
<p>Meta ကုမ္ပဏီဟာ AI မော်ဒယ် တွေနဲ့ Virtual World တွေအပြင် အခုတော့ လူတူစက်ရုပ်ပြိုင်ပွဲထဲဝင်ရောက်တော့မှာပါ။</p>
Meta ကုမ္ပဏီဟာ AI မော်ဒယ် တွေနဲ့ Virtual World တွေအပြင် အခုတော့ လူတူစက်ရုပ်ပြိုင်ပွဲထဲဝင်ရောက်တော့မှာပါ။ Meta ဟာ လူတူစက်ရုပ်တွေအတွက် AI မော်ဒယ်တွေ တီထွင်နေတဲ့ Assured Robot Intelligence (ARI) စတာ့အပ် ကုမ္ပဏီကို ဝယ်ယူလိုက်ပါတယ်။
အဲဒီဝယ်ယူမှုကြောင့် ARI ရဲ့ ရိုဘော့သုတေသနပညာရှင်တွေ ဖြစ်တဲ့ Lerrel Pinto နဲ့ Xiaolong Wang အပါအဝင် အဖွဲ့သားတွေဟာ Meta ရဲ့ Superintelligence Labs ဌာနဆီ ပူးပေါင်းသွားမှာဖြစ်ပြီး အဆင့်မြင့် လူတူစက်ရုပ် ဉာဏ်ရည်နဲ့ ထိန်းချုပ်ရေးစနစ်တွေကို ရေးဆွဲသွားမှာပါ။
ARI ကုမ္ပဏီဟာ စက်ရုပ်တွေရဲ့ ဦးနှောက်ပိုင်းဆိုင်ရာ AI စနစ်ကို အဓိကထား တီထွင်တာဖြစ်ပြီး စက်ပစ္စည်းတွေအနေနဲ့ ပတ်ဝန်းကျင်ကို နားလည်နိုင်ဖို့၊ လုပ်ဆောင်ချက်တွေကို ခန့်မှန်းနိုင်ဖို့၊ အတွေ့အကြုံကနေ သင်ယူနိုင်ဖို့နဲ့ လူတွေရဲ့ ပတ်ဝန်းကျင်မှာ လိုက်လျောညီထွေ ဆောင်ရွက်နိုင်ဖို့ ကူညီပေးတာဖြစ်ပါတယ်။
အဲဒီနည်းပညာဟာ အနာဂတ် လူတူစက်ရုပ်တွေအနေနဲ့ ကာယလုပ်ငန်းတွေနဲ့ အိမ်တွင်းကိစ္စတွေ အပါအဝင် လက်တွေ့ကမ္ဘာရဲ့ လုပ်ငန်းတွေကို ပိုင်ပိုင်နိုင်နိုင် လုပ်ဆောင်နိုင်စွမ်း ရှိလာအောင် ရည်ရွယ်တာ ဖြစ်ပါတယ်။ ဝန်ထမ်း ၂၀ ခန့်ရှိတဲ့ အဲဒီ စတာ့အပ်ကို ဝယ်ယူခဲ့တဲ့ ငွေကြေးပမာဏကိုတော့ ထုတ်ဖော်ပြောကြားခြင်း မရှိသေးပါဘူး။
အခုဝယ်ယူမှုကြောင့် Meta ဟာ Tesla၊ Google နဲ့ Amazon တို့လို လူတူစက်ရုပ်နည်းပညာ ပြိုင်ဆိုင်နေတဲ့ အဓိက နည်းပညာဘီလူးကြီးတွေနဲ့အတူ ပြိုင်ပွဲထဲ အရှိန်အဟုန်မြှင့် ဝင်ရောက်လာခဲ့တာ ဖြစ်ပါတယ်။
ဒါပေမဲ့ Meta ဘက်ကတော့ လူတူစက်ရုပ်ကို ရောင်းချသွားမယ်လို့ ထုတ်ပြန်ထားခြင်း မရှိသေးဘဲ အနာဂတ် စက်ရုပ်တွေကို မောင်းနှင်ပေးနိုင်မယ့် AI နည်းပညာ တီထွင်ဖို့ပေါ်မှာပဲ အဓိက အာရုံစိုက်ထားတာ ဖြစ်ပါတယ်။
