AI သုံးတာများရင် ဝေဖန်ပိုင်းခြားတွေးခေါ်နိုင်စွမ်း ကျဆင်းတယ်လို့ စစ်တမ်းက ဖော်ပြ
<p>AI ကို လွန်လွန်ကဲကဲ အားကိုးသုံးစွဲခြင်းက ဝေဖန်ပိုင်းခြားတွေးခေါ်နိုင်စွမ်းကို လျှော့ကျစေနိုင်တယ်လို့ မကြာသေးမီက ပြုလုပ်ခဲ့တဲ့ သုတေသန စာတမ်းနှစ်စောင်မှာ</p>
AI ကို လွန်လွန်ကဲကဲ အားကိုးသုံးစွဲခြင်းက ဝေဖန်ပိုင်းခြားတွေးခေါ်နိုင်စွမ်းကို လျှော့ကျစေနိုင်တယ်လို့ မကြာသေးမီက ပြုလုပ်ခဲ့တဲ့ သုတေသန စာတမ်းနှစ်စောင်မှာ ဖော်ပြထားပါတယ်။
Microsoft Research ရဲ့ လုပ်ငန်းခွင်အသီးသီးက ပညာရှင် ၃၁၉ ဦး၊ AI ချိတ်ဆက်လုပ်ဆောင်တဲ့ လုပ်ငန်းပေါင်း ၉၃၆ ခုကို လေ့လာဆန်းစစ်ခဲ့တဲ့ သုတေသနအရ AI ကို ပိုမိုယုံကြည်သူတွေဟာ ကိုယ်တိုင် ပြဿနာဖြေရှင်းတာထက် AI ရဲ့ အဖြေတွေကို စစ်ဆေးပြင်ဆင်တာမျိုးပဲ ပိုမိုလုပ်ဆောင်ကြတာကြောင့် ဝေဖန်ပိုင်းခြား စဉ်းစားမှု အားစိုက်ထုတ်မှု နည်းပါးသွားတာကို တွေ့ရှိခဲ့ရပါတယ်။
နောက်ထပ် လူပေါင်း ၆၆၆ ဦး ပါဝင်တဲ့ သုတေသနတစ်ခုမှာလည်း AI ကို မကြာခဏ အသုံးပြုခြင်းဟာ ဝေဖန်ပိုင်းခြား စဉ်းစားနိုင်စွမ်း လျော့ကျခြင်းနဲ့ ဆက်စပ်နေတာကို တွေ့ရပါတယ်။
ဒါဟာ မိမိကိုယ်တိုင် စိစစ်တွေးခေါ်ရမယ့် ဦးနှောက်လုပ်ဆောင်ချက်တွေအတွက် နည်းပညာကို အလွန်အကျွံ အားကိုးလိုက်တဲ့ cognitive offloading အလေ့အထကြောင့်ဖြစ်ပြီး အသက် ၁၇ နှစ်ကနေ ၂၅ နှစ်ကြား လူငယ်တွေမှာ ပိုမိုသိသာတာကို တွေ့ရပါတယ်။
ဒါပေမဲ့ အဆိုပါ သုတေသနတွေဟာ AI ကြောင့် စဉ်းစားနိုင်စွမ်း ကျဆင်းသွားတာကို တိုက်ရိုက် သက်သေပြနေတာမဟုတ်ဘဲ ဆက်စပ်မှုကိုပဲ ဖော်ပြထားတာဖြစ်တာကြောင့် ရေရှည်သက်ရောက်မှုတွေကို ထပ်မံလေ့လာဖို့ လိုအပ်ဦးမှာ ဖြစ်ပါတယ်။
ပညာရှင်တွေကတော့ AI ကို အကျိုးရှိရှိ အသုံးပြုရင် သင်ယူမှုနဲ့ ကုန်ထုတ်လုပ်မှုအတွက် တန်ဖိုးရှိတဲ့ ကိရိယာတစ်ခုအဖြစ် ရှိနေဆဲပဲလို့ ထောက်ပြထားပါတယ်။
ဒါကြောင့် AI ကို လူတွေရဲ့ စဉ်းစားတွေးခေါ်မှုကို အစားထိုးဖို့ မဟုတ်ဘဲ အထောက်အကူပြုဖို့အတွက်ပဲ အသုံးပြုကြဖို့နဲ့ AI က ထုတ်ပေးတဲ့ အချက်အလက်တွေကို သံသယရှိရှိ မေးခွန်းထုတ်၊ စိစစ်ပြီး ဝေဖန်ပိုင်းခြား စဉ်းစားကြဖို့ အကြံပြုထားပါတယ်။
