အရွယ်ကြီး ဘက်ထရီတွေနဲ့ Snapdragon 6 Chip တွေ ပါတဲ့ Redmi Note 17 Pro နဲ့ Pro Max ကို ကြေညာ

<p>စမတ်ဖုန်းဈေးကွက်ကို လှုပ်ခတ်သွားစေမယ့် ဘက်ထရီဧရာမကြီးတွေနဲ့အတူ Redmi Note 17 Pro  နဲ့ Redmi Note</p>

စမတ်ဖုန်းဈေးကွက်ကို လှုပ်ခတ်သွားစေမယ့် ဘက်ထရီဧရာမကြီးတွေနဲ့အတူ Redmi Note 17 Pro  နဲ့ Redmi Note 17 Pro Max တွေကို နိုင်ငံတကာအတွက် တရားဝင်မိတ်ဆက်လိုက်ပါပြီ။ ဒီဖုန်းအသစ်တွေမှာ အမြင်အာရုံကို ဖမ်းစားနိုင်မယ့် ၆.၈၃ လက်မအရွယ် 120Hz OLED မျက်နှာပြင်တွေကို တပ်ဆင်ထားပြီး အမြင့်ဆုံးတောက်ပမှု 3,500 nits အထိ ပေးစွမ်းနိုင်တာကြောင့် နေရောင်အောက်မှာတောင် ရှင်းလင်းပြတ်သားစွာ မြင်တွေ့နိုင်မှာဖြစ်ပါတယ်။ မျက်နှာပြင် မတော်တဆထိခိုက်မှုတွေအတွက်လည်း အကြမ်းခံတဲ့ Gorilla Glass Victus 2 မှန်ကို အသုံးပြုပေးထားပါတယ်။

ဒီဖုန်းတွေရဲ့ အမိုက်စားဆုံး အချက်ကတော့ သာမန်ထက် အများကြီးပိုကြီးမယ့် Si/C ဘက်ထရီနည်းပညာ အသစ်ကို အသုံးပြုထားတာပဲ ဖြစ်ပါတယ်။ Pro မော်ဒယ်မှာ 8,340mAh ဘက်ထရီကို 67W အားမြန်သွင်းစနစ်နဲ့ တွဲဖက်ပေးထားပြီး Pro Max မှာတော့ စံချိန်တင် 9,210mAh ဘက်ထရီကြီးကို 100W အားမြန်သွင်းစနစ်နဲ့ ထည့်သွင်းပေးထားပါတယ်။ အဲဒီဘက်ထရီ ပမာဏတွေကြောင့် အားကုန်သွားမှာကို စိုးရိမ်စရာမလိုတော့တဲ့အပြင် အခြားစက်ပစ္စည်းတွေကိုပါ အားပြန်ဖြည့်ပေးနိုင်တဲ့ reverse charging စနစ်လည်း ပါဝင်လာပါတယ်။

လုပ်ဆောင်ရည်ပိုင်းအတွက်လည်း အားရစရာကောင်းအောင် မြှင့်တင်ထားပါတယ်။ Redmi Note 17 Pro မှာ Snapdragon 6s Gen 4 ချစ်ပ်ကို သုံးထားပြီး Pro Max မှာတော့ ပိုမိုသွက်လက်မြန်ဆန်တဲ့ Snapdragon 6 Gen 5 ချစ်ပ်ကို တပ်ဆင်ထားပါတယ်။ ဒါ့အပြင် RAM 12GB နဲ့ Storage 512GB အထိ စိတ်ကြိုက်ရွေးချယ်နိုင်မယ့် အပြင် ရေနဲ့ဖုန်ဒဏ်ကို ကောင်းကောင်းခံနိုင်ရည်ရှိတဲ့ IP68 အဆင့် သတ်မှတ်ချက်ပါ ရရှိထားတာကြောင့် နေရာမရွေး စိတ်ချလက်ချ အသုံးပြုနိုင်မှာ ဖြစ်ပါတယ်။

ကင်မရာပိုင်းမှာတော့ အရင်ကသုံးခဲ့တဲ့ 200MP ကင်မရာတွေအစား ပိုပြီးလက်တွေ့ကျကျ ရိုက်ကူးနိုင်မယ့် 50MP OIS ပင်မကင်မရာနဲ့ 8MP ultra-wide ကင်မရာတွေကို ပြောင်းလဲတပ်ဆင်ထားပါတယ်။ Pro Max မော်ဒယ်ရဲ့ ကင်မရာဆင်ဆာက ပိုမိုကြီးမားပြီး 32MP ဆဲလ်ဖီးကင်မရာ အလန်းစားလေးလည်း ပါဝင်ပါတယ်။ စျေးနှုန်းတွေအနေနဲ့ Redmi Note 17 Pro ကို ဒေါ်လာ ၄၀၀ ကနေ စတင်ရောင်းချပေးသွားမှာဖြစ်ပြီး ပိုမိုပြည့်စုံတဲ့ Pro Max ကိုတော့ ဒေါ်လာ ၅၀၀ ကနေ စတင်ဝယ်ယူနိုင်မှာ ဖြစ်ပါတယ်။

Ref : gsmarena