အရှေ့တောင်အာရှမှာ Google Gemini သုံးစွဲသူ ၂ ဆ မြင့်တက်လာ

<p>အရှေ့တောင်အာရှ ဒေသမှာ Google Gemini အက်ပ် အသုံးပြုသူ အရေအတွက်ဟာ တစ်နှစ်အတွင်း နှစ်ဆကျော်အထိ တိုးတက်လာခဲ့ပြီး</p>

အရှေ့တောင်အာရှ ဒေသမှာ Google Gemini အက်ပ် အသုံးပြုသူ အရေအတွက်ဟာ တစ်နှစ်အတွင်း နှစ်ဆကျော်အထိ တိုးတက်လာခဲ့ပြီး အခြား Google အက်ပ်တွေထက် အသုံးပြုမှု မြန်ဆန်စွာ မြင့်တက်လာနေပါတယ်။

Gen Z လူငယ်တွေနဲ့ ဒေသတွင်း ဘာသာစကား ပံ့ပိုးပေးနိုင်မှုတွေဟာ အဲဒီလို တိုးတက်လာရခြင်းရဲ့ အဓိက အကြောင်းရင်း ဖြစ်ပါတယ်။ အရှေ့တောင်အာရှက သုံးစွဲသူတွေရဲ့ စိတ်ပါဝင်စားမှုဟာ ကမ္ဘာ့ပျမ်းမျှထက် သုံးဆအထိ ပိုမိုမြင့်မားနေပြီး ပညာရေး၊ တီထွင်ဖန်တီးမှုနဲ့ စီးပွားရေး လုပ်ငန်းတွေမှာ Gemini ကို ပိုမို အသုံးချလာကြပါတယ်။

ဒေသတွင်းမှာ အသုံးပြုမှု ၇၀ ရာခိုင်နှုန်းခန့်ကို မိခင်နိုင်ငံဘာသာစကားတွေနဲ့ ရေးသားကြပြီး အထူးသဖြင့် ဗီယက်နမ်၊ ထိုင်းနဲ့ အင်ဒိုနီးရှား ဘာသာစကားတွေ ပါဝင်ပါတယ်။

ထိုင်းနိုင်ငံမှာဆိုရင် မေးမြန်းမှုရဲ့ ၈၇ ရာခိုင်နှုန်းကို ထိုင်းဘာသာနဲ့ ရေးသားကြပြီး လူနေမှုဘဝဆိုင်ရာ မေးခွန်းတွေ မေးမြန်းမှုမှာ ထိပ်ဆုံးက ပါဝင်နေပါတယ်။

ဒါ့အပြင် အင်ဒိုနီးရှားမှာ အသံနဲ့ ရုပ်ပုံ သုံးပြီး မေးမြန်းမှု ပိုများသလို စင်ကာပူ၊ ဖိလစ်ပိုင်နဲ့ မလေးရှားနိုင်ငံတွေမှာလည်း သက်ဆိုင်ရာ ဒေသအလိုက် တီထွင်ဖန်တီးမှုတွေနဲ့ စိန်ခေါ်မှုတွေကို ဖြေရှင်းဖို့အတွက် Gemini ကို အသုံးပြုကြပါတယ်။

Google အနေနဲ့ အဲဒီဒေသမှာ AI နည်းပညာ ဗဟုသုတတွေ ပိုမို ပြန့်ပွားလာစေဖို့ Gemini Academy အစီအစဉ်တွေနဲ့အတူ မိတ်ဖက်အဖွဲ့အစည်းတွေနဲ့ ပူးပေါင်း ဆောင်ရွက်လျက် ရှိပါတယ်။

ဒါ့အပြင် Gmail နဲ့ Google Photos တို့လို အက်ပ်တွေနဲ့ ချိတ်ဆက် အသုံးပြုနိုင်မယ့် AI agents တွေ၊ Daily Brief နဲ့ Gemini Spark စတဲ့ လုပ်ဆောင်ချက် အသစ်တွေကိုလည်း မိတ်ဆက်ပေးနေပြီး သုံးစွဲသူတွေရဲ့ နေ့စဉ်ဘဝကို ပိုမို လွယ်ကူ ချောမွေ့လာစေဖို့ ဒေသတွင်း ဘာသာစကားတွေနဲ့ တိုးချဲ့ ဝန်ဆောင်မှု ပေးသွားမှာ ဖြစ်ပါတယ်။

Ref: Bangkokpost